Noreen Mutera born in November. Akadzidza akawanda magwaro eCIPS ne Cutting and Designing paSpeciss College yemuBulawayo. Zvinyorwa zvake zvinosanganisira mitambo yemafirimu,, nganonyorwa, nhetembo nezvimwe zvakawanda. Noreen anokurudzira zvebudiriro yetsika nemagariro, uye iye pachake ndiamai. Zvimwe zvipo zvake zvinosanganisira kutamba nekudzidzisa kutamba kana kudzana, achivazve jaji mukuru weunynzvi ihwohwu kuburikidza nebato re NAPH. Nekuda kwehudobi hwake mukunyora nduri, akakumbirwa nevatungamiri veChisiya kuti atumire nhetembo dzake kuMunyori Literary Journal. Tinotenda nekubvuma kwake kuita saizvozvo, nekuti onayi henyu zviri pasi apo.
Hedzinoyi Nhetembo Dza Noreen Mutera
Mwoyo
Zvawangova jekakwese banga remakara.
Kuvhutira ruvengo rwotutumadza hana.
Kutadza kufema nokuda kwemwoyo wasunama!
Wakaita hake nyadenga asina kupa simba rokuumba nekuputsa.
Chokwadi vamwe taidya vachifamba!
Zvawamera bvudzi sechirebvu chembudzi pane achaugona here mwoyo uyu?
Wasarudza kufuka gumbeze redzinira mbuya.
Pandaiona tichiberekana kumahumbwe ndaiti hazvibviri ndokuberekwaka uku!
Kutenda nekupembera vabereki vakasunganidza pwere nerukodzi rwerudo!
Yohwe ndaizivei kuti rangova bvunurwa renyoka yakaenda kare,
rangova runda rwakatetenwa nemujuru.
Hapana zviripo makumbo enyoka wangova muhwezva chidziro chezvaivepo.
Bvaa unondirwadzisa mwoyo mwanawamai. Chiiko chakanyanyoshata zvokurasirana nhanga kutadza kutsikidzana munhanga?
Haufadzi uhwu hupenyu veropa mopfekerana mwoyo une majuzi!
Ndiwo mwoyo unoti chawasunga wasunga,zvino muchenjere kuusingisa chikazovazve chifo mangwana.
Bvaa panoda mwoyo gwanza harisviki
chinongova chimhukutira mimba yesheshe
unoti humhiza jongwe izvo kutapirirwa.
Ngaisiye matambo vanyamunhu
wiriranai, rasai mwoyo wemandini
chaitwa nemumwe chaitwa nemi mose.
Zvomoramba makasunga mwoyo budiriro yobvepiko?
Hanzi handinei naye,kuti zvadini?
Upfumi hausi hwenyika ndehwenyu varimo munyika,
chirasai zimwoyo iro muyanane.
Munhu mwoyo,mwoyo munhu,
Zvino zvomoda kupatsanura mosara neiko?
Pazvairehwa aive magadhi
yakamhazhika kufamba mutsimba.
Musati hatina kupfuura nepano
tikamwinimwira,zvava zvenyu hero jira ndakanda.
Ndapfuuramo asi ziva kwedu takarasa
tava nemwoyo mumwe!
Ini
Ndini zvangu ini
Ini chaiye ndini!
Ndadirei kuti isu,
Ini ndirini!
Mheno zvenyu moda kuwanzwa paushoma!
Ndakangodai zvangu ini!
Werunako!
Ane ziso rinocheka semheni, kutadza
kundiona igodo renyu!
Asi ndini.
Werudo rwunotapira serunodyiwa,
weziya rinogutsa semukaka wekacheche.
Ini zvangu mwana akazvarwa nguva iripo.
Pandoreva rangu zita hana dzotekenyedzwa.
Pandasvika mufaro chete chete
Ehezvee ndini!
Ungazodei wemutema!
Ndini zvangu wenyemwerero
Inodzosa neavapanhovo!
Chitubu chemafaro!
Kufarira kufara nevanofara!
Vasina tsinye kana nhunha!
Ngatitandare kufa kwakauya
Ndini zvangu ndadaro!!!!!
Serisakadyiwa nyama
Ndaikuchemera kuchembera uku!
Ndaiziva here kuzvigokera moto muziso!
Heya ndashata nhasi nokuti ndachembera?
Ndichiri chimhandara miswe
yaitambatamba mandiona.
Ndiro here ganda reukweguru rondipisa
munyama kudai?
Ndashata nhasi nokuti zvandaisigona
kuzviitira handichagoni?
Kukura kubara uroyi here vehama?
Chokudya ndoita chokukandirwa sehuku,
usati zvinoperera ipapa,
Naipowo pokurara kugundurutswa
senherera yepaguru.
Nhai vehama imhosva here kuchembera?
Ndiko here kusakara kwaro dovo
kuita serisakadyiwa nyama?
Nezuro maindipa zvizukuru ndichikangira nzungu,
nhasi uno hezvo vonditya,ndoita vekuonera kumifananidzo.
Kwaiva kuteya rangu zuva rekufa,
maiti ndife ndisina nhunha nemi nhai?!
Chinokura chinokotama
musoro wegudo chava chinokoro.
Maiti zvodudzeiko zvomoramba kunokora kwacho.
Haiwa kukura ijambwa hazvinditadzisi
nemi muchapasvika.!
Ndiko kusakara kwaro serisakadyiwa nyama!
Nhandare
Ndaive ndafara ndikati wangu ayaruka.
Ayaruka opinda munhandare yeupenyu!
Ko, ndaizivei ?
Munhandare yavo vanakomana izere minzwa inobaya.
Chifara wakangwarira chikomana.
Nhandare yetsvetsvano haiidi ushasha unovirirwa dzachena.
Iro shoko rotoda kupima nekuyera wekurikandira.
Rega kunge unokanda hwiti yemarororo;
chenjera waunotamba naye.
Rudo ndiyo pfumbidzo yetsotso dzewanano.
Mwanasikana chava chikara chikomana,
wangomunyengedza unotongerwa mhosva yechibharo.
Bva zvinorwadza isu veura hunotakura mwedzi mipfumbamwe.
Zvahurihwozve hura hunosvina mose mukomana nemusikana.
Panochema mukomana guru rinodavira,
Pochemazve musikana guru rosunga.
Zvahurihwozve ura mapako mati ponzwinywi??
Dzidziso yekuti mukomana nemusikana
ihanzvadzi nehanzvadzi zvakaendepi?
Kuita hwegonzo nekiti here?
Wanana haichina kana nechiremera.
Kungotsiura mudzimai vemutemo vatosvika.
Aiziva kuti ndiyo nhandare
Yetsvetsvano zvaichava ndiyani?
Zvinorwadza wakabereka
Kushungurudzirwa wawakabereka.
Wapindwa neiko mwanasikana?
Dzora mwoyo kuhanzvadzi yako.
Ndokutamba kwacho here?
Hapasi panopfimbwa uchiwanikwazve nhai,
Ko yechibharo yabvepiko yowoomesera mwanakomana.
Tsvetsvano hadzisi dzose dzewanano chisikana.
Kana zvaramba usapomera chibharo.
Ndambonyarara asi rekubereka
Guru rochemera kodzero dzejaya rangu.
Pakushanda ndiye mudyi weziya,
Pamusha ndiye baba vemusha.
Moti titye here kutakura yemwanakomana mimba!
Dai waro mamupawo kodzero mwanakomana.
Mbavha mhondi munobvunzurudza wani?
Ko yetsvetsvano hainawo here manzwana matama?
Madirei kuuraya guru rembereko?!
Ngaigadziriswe kodzero yemwanakomana,
Nokuti zvairipo inorwadzazve ini Mai mutumburi!!!
Mari
Mhorozve nhai mari.
ko ini wandizivawo here?
Ndini zvangu ndasarudza kuumba ukama newe!
Zvauriwe mudiwa wemunhu wese!.
Ndati ndakakutarisa mari
chokwadi wakaoma!
Ndiwe wakosha kudarika upenyu hweaakakutakura!.
Ndati ndinzwe kwauri nhai iwe
kuti basa rako nderei?
Nezuro ndakatenga musha
ndikabisa mazazananda ako iwe mari
Asi bva wakagoitei,wakashanduka here?
Chokwadi ndatova benzi
Nokuda kunzwisisa nezvako iwe !
Dzinza rako riripi nhai mari,
ndinobvira ivo vakakubereka?!.
Wakatekeshera pasi rose
ari ani asingakuzivi?
Nekari parusvava kungokubata zenze tugu
wototonga pakari!
Waita mukurumbira wadarika hwanyadenga iwe !
Mabasa ako andikandisa mapfumo pasi!
Ko nhai mari paunonzi wapera simba hauchatengi,
Unenge watsamweiko?!
Iwo mavara ako kuyevedza!
Chokwadi unokwezva zvisina akamboona!
Nyika yangova besanwa,
rinomhanya ,rinodzika vese durumwandira!
Kuri kutsvaga iwe!
Asi wakagoitei nhai mari?!
Une dura here iwe?
Ko vana zvavo?
Ko vakafa madzitateguru ako aripi?
Guhwa
Parinotangwa! ihongu hongu kurigutsurira nzeve,
Dzosokoserwa kunzwa shoko rauya nemurevi!
Inzwa unzwe zvikwee zvodamburwa kuri kutapirwa!
Chirega unzwe rosimudzwa pamuzinda paraparurirwa!
Chokwadi unooma mate mukwana naro !
Rinosimuka ravanezvibikwa,zvinovavira nekutapira isanganiswa!.
Mvana nemhandara!,rangova zeve zeve kuri kutya
Kunzwika nemupfuuri,zvikwee zvoridzwa kufarira rauya!.
Chirega unzwe parinosvika pane wetatu,chokwadi muto waro
Unenge wakora!,hero rokungurutswa rakananga warabikirwa
Paanori burirwa ndiye zhete!.
Ko!rinonetesaka,vamwe ndovanopihwa hasha naro,
Ndakariona!,ndikarinzwa!,uye ndinoriziva!.
Hedzo!chembere neharahwa
Misoro ndiye dhuma dhuma pamwe kuyedza kuzeya rauya
Risina chifuko!,makuva ocherwa; miganhu yotemeranwa
Mbariro dzopfurunurwa kana zviri zvisuvi hatichatauri!
Musha ndiye mokoto,kuri vhunza pane acharida!
Inongova naku naku,ko pane achada kuridzorerwa?
Ko iro kunyadza kwaro,kana rodzerwa wakauya naro!
Chokwadi unoita pasi ndimedze,harina mukuru kana
Mudiki!,mukobvu kana mutete,isanganiswa homwe
Yebenzi,
Rwuri rurimi rwupupi rwarinosema?!
Ndau,venda,manyika,zezuru,Ndebele kana naicho chirungu
Zvirikowo!ndaoma mate mukanwa naro ini,
GUHWA URI MHARADZI!.
GWENYAMBIRA.
Rotekenyurwa maungira aro obvuta mwoyo wenharaunda!,
Nhandare yavabesanwa kumhanyira jaya radai kusvikirwa
Neshavi rokutekenya!,musoro worerekwa parutivi,gwenyambira
Oshereketa,idzo hana dzotekenyedzwa nemaungiro aro deze,
Radai kutsamwa!.
Mhukuta mudenga ndiye togoo! Mhapa neshashiko!zvangova
Mveyesana muzviuno zvemhandara,majaya semiswe dungwe
Ndiye rokoto!, kutevera chikomba chashanyira hana dze
Tsvarakadenga munharaunda yazame.
Chirega rorereka zuva riya!, midzimu yenyika yodzekedzana,
Heyo!yodzvoveswa nagwenyambira, wadai kushanyira
Mumuzinda wayo!,guduru guduru!,hari kuri kumhanyira
Vabve nyika dzimu!,manja oiswa pamwe!,madzimai zvisero
Zvopetwa!,oturikwa maoko!,kukudza vene venzvimbo!
Mhondoro dzenyika!,,vekumapako!,vaTovera!
Imi vanagara dziva!, midzimu ndiringe!,vana chirera nherera!,
Tokuomberai!,nharaunda ndiye mwiro!,nzeve dzopihwa
Vene vadzashanyira wapedza rake basa GWENYAMBIRA!.
Shoko
Nezuro ndakarireva mukati harina maturo!
Rogoshaiwa maturo sei serisina kubva mumukanwa?
Hezvo radudzirwa moti daitakaziva,dai makaziveiko imi makaritonga richangosvika?
Richauya makarishungurudza,mukarishoropodza,ndokukanganwa kuti chati homu chareva.
Mukakanganwa kuziva kuti mudyi wezuva inguva, nokuti parinorehwa rinenguva !
Musadaro vehama,seiko musingadi kuchenga ose?
Zvavarivozve vakuru vakati shoko harina zera. Sei ranhasi rava nezera hama dzangu?
Hanzi harina musoro,harina musoro rataurwa nemurombo,pane vapfumi.
Pavanohotsira vane mari,varombo misoro mogutsurira.
Ritorei sekuuya kwaro,harinei rauya nani!
Zvamakanzwa murwere wepfungwa ATI ngwarirai hondo,imi bvuu kuseka,,maive maona kusakosha kwaro zuva risati rakwira nhai vehama?
Ko maziva chamutaudzisa here,cherechedzai chamutaudzisa muchione hama.
Mari Sandi njere,kuziva Sandi kugona,kugona Sandi kunatsa.
Ritorei hama yangu harina Zita ,harina mutupo ringori shoko,Tora sezvariri uwedzere humare hwemumatama.
Nhai imi venjere,vanamugona zvese tonyarara here nokuti
Hatina chitinacho isu varombo?
Paraturwa hanzi rataurwa Nani,rafungwa Nani,ndiwo here mutambo wemumatama?
Rinotererwa ,rine uremu nderevane matumbu,ivo vemvere dzakati serere!
Nhai vehama madii mangorinzwa zvichida rine upfumi neupenyu.
Ko murombo zvaari munhu want kuvigwa hunge afa wani?
Ritorei murinzwe rake shoko!!!!!
Ramangwana
Ngarirongerwe ramangwana iri! Majaya nemhandara!
Farai muine ramangwana mumaoko nokuti, pariri
Ranhasi hapazi pamangwana,iro ramangwana
Ravakuda umhare hwepfungwa!.
Ramangwana rinoraramiwa nhasi sahwira!,usazochema
Woti havana kutaura nokuti !, parinobuda rine zvaro
Parinodoka rinoenda nezvaro,raenda haridzoki!
Harinei wanga usipo,ko ndiko kupindana nekufamba
Kwawo mazuva!.
Chisvinudza meso utsvage raunoda kuti rimire sei!
Tarisa raunoda kuti rimire sei!,tarira vakarirongera
Vodya zvavo uchi nemukaka hweupenyu!,
Ukasarirongera chokwadi unovaviwa neunye hwaro!.
Unoraramira vakashandisa njere maoko vakaisa
Kune vanesimba njere vasina!.
Bvaa! Dai ramangwana riine pfimbi,vamwe matura
Aipfachukira neumhare!,ndirege zvangu ndichiri mhanyira
Risati raenda sahwira rinotoda kurongerwa!.
