CHARLTON NYONI akaberekwa muzuva regumi nashanu mumwedzi wambudzi mugore ra 1967 muguta re BULAWAYO. Zvikoro zvaakadzidza ndeizvi: Magwegwe primary. Nyamande primary. Njube High. Speciss Col. Byo Poly. Wits (SA) Anonyora ne chirungu, chishona, Ndebele ne Kalanga. Kunze kwekunyora anoita ART yose ingaonekwe neziso: Mumagwaro, zvivhitivhiti, nziyo, nekudandemidande kunowanikwa mabasa ake.
Charlton Nyoni was born in the city of Bulawayo in the year of nineteen hunderd and sixty seven. His first poem was published in The Chronicle in 1982 but he went on to do creative art , then commecial art and finally fine art. During which time he never stoped publishing stories and poems but also wrote for the screen.
UCharlton Nyoni ngumlobi oseleminyaka eqabuka ngo1982 ekhipha inkondlo lendatshana. Yena wazalwa ngomyaka ka 1967 edolobheni lakoBulawayo.
Mugoni Wetsumo
Mugoni wetsumo ndeanoziva kwekuishandisa.
Vamwe vachizvisanganisa semutakura,
Kuita makanyanise munyu ne mavhu.
Kungwara kwetsumo kuudza waunoda.
Dziripo tsumo dzinotosvora njere,
Idzodzo usadzipe vasina dzinopinza.
Nekuti dzimwe njere mavende adzigoni kutsenga,
Dzimwe zvekare dzakashanya – chimirira dzidzoke.
Ivavo tsumo inowana vasipo ukanyara.
Mugoni wetsumo unoiridza sembira
Igotambirika, igotambwa serekodhi, igoterereka.
Semvura inotinhira pahore yakati ndo-o,
Inocheukwa nemunhuwese.
Dziripo dzinoda kunyudza badza tsumo,
Dzimwe dzinodimikira dzichibhendera; zvirahwe zvinozvimbisa urozvi.
Dzimwe dzichiuya semadimikira dzakapfekedzwa juzi refamanidzo,
Nedzimwe dzinouyanawo dzakarungwa mazwi anopokana
Dzimwe dzinopa kuchenjera kune anotaura
Dzimwe dzichipa njere kudya kunopa muviri.
Mugoni wetsumo munozosara mopenyerwa akupai gotsi,
Mashoko ake mamwe anokubatai kumeso agoramba kuvhurika.
Paanoda anokutsiudza.
Paanoda anokukurudzira
Paanoda anosimudzira waanoda.
Pamwe munosara makabata mapapiro ezvaanoreva.
Asi tsumo yake asara nayo.
Nhunzi
Hutsvina hwenhunzi hunoonekwa neasinganwi doro
Iyo kugara yapukuta maoko kuramba mhaka
Kufarira zvakaora nezvakaorera zvose zvirimairi
Huri hunhunzi kunetsa nehudokwana
Pagurususurayo inohutakura hurwere,
Inouraya munhu kana nemhuka hombe
Hairoveki zvekumhanya ungashangazhika,
Ukamhanya uko nouko hako!
Haifiri paruoko inofira pamukaka nhunzi
Yofira padoro nepausavi hwako
Kutsvina kwainotambira haifiriko
Inofira mumvura uchida kuimwa.
Mukoma
Pakutaurirana mukoma
Ndezve pakutaurirana.
Wakakwana here iwe?
Ndirikubvunza dzakati kwesere here?
Zvawasvetukira yangu kora yakutadzira chii?
Waidzvinya ukai unyanisa seine mhosva
Haunyari here kurwa nejira?
Washaiwa here muromo?
Ichakupindura here kora iyoyo?
Ini wangu ndasona muromo,
Aikazve wavakuti nditaureizve,
Iwe wanga uchirwa nechidzipanyota
Uchiedza kudzipa yangu nyota.
Ngaikupe zvacho zvaunoda?
Saka wanei?
Ini ndawana mavanga
Iwe mari yoperera pakuzondiona
Ee-e ipurasita; musoro sandi jira ibhandeji.
Ndiwozve mangoromera!
Hanzi mishonga inotengwa namuparanzvongo
Mapurisa anokudazve
Dhora rako ndichakupa,
Hasha dzako dzokuripisa makunun’u maodza mwoyo.
Hwiza
Kuripo kungwara kwemhashu inemaziso anenge mapundu.
Iwo anotarisa zvirikunyangira neshure
Kuripo kungwara kwemhashu inosvetuka nemakumbo anobaya
Kubaya chonyangira iyo ichibhururuka
Kumberikwayo hakunei nemaziso
Inadzonyanga sechivhitivhiti,
Dzinobata masaisai ezvinouya
Inouziva hurema hwayo mhashu
Musoro wayo wakanamira padhende
Huro idemhe kuvharidzira dhende remutsipa
Irodhende rinova wayo mutsipa
Ihwiza varume ihwiza
Inomoyo wakarembera kunze kwechipfuva
Asi moyo wayo haubatikani sewomunhu
Wayo muromo unemaoko mambozviona?
Kuti ibate zvinobvinza painodya
Ukundiko kungwara kwe mhashu
Hove dzichiida, shiri dzichiida
Nemunhu achiida nemasvosve asinganyari
Inozviziva izvozvo mhashu!
Iyo inodya mashizha,
Ichikanganwa kuti ichada pokuvanda.
Yakatarira vayo vanyangiri.
Mwanakomana
Ndakatarira zvirimberi kwangu moyo ukadavira
Ndakamuona achiuya mwana womunhu achifamba
Iye mwanakomana akanaka moyo nemhumhu zvese
Kusina nguvangani ndakarohwa nemheni yorudo
Kusaziva zvaiitika ndikazokaruka moyo wongongodza chipfuva
Ndakazara nekunyara ndatarisana naye
Pamwe ainge azviona zvaiitika mandiri
Ndonyarirepi?
Mitezo kuti twii kana kumbo zungunuka
Takatarisana ndikaona sekunge nyika yofa hayo nembabvu kuseka
Zvandiri izvi tsvina nehuori,
Humbava neruchiva rwembiri ndisingafambi neusina motokari
Ndichiona ropa rake richidonha mumaburi emumaoko
Iye achinyemwerera achida kundimbundikira akadaro
Netsvina yangu pamaronda iwawo ko corona haitye here?
Dombo remoyo wangu ndakanzwa richinyunguduka nekureruka
Ini kuita tsitsi; ini chaiye kuita tsitsi, mwana waBerejena haiwa!
Ndo pandakati dhu-u mumoyo wanyunguduka!
Tsitsi ndokupomerwa nerudo raakandipa murume uyu.
Waipenya zvaiveneka zvandiri zvose ndikanzwa kunyara
Nokugeda geda kwameno namabvi kukuru
Saka kwandiri aionei?
Kwekuvanda ndakakushaiwa kwaasingavheneki
Saka zvino ndoitasei?
Kupfugama kwakauya koga mumabvi angu misodzi ikayerera
Pamatama angu yakaerera pasina mudzivisi
Ndamuda uyu; ndamuda mununuri
Ndamuda chaizvo mwanakomana womunhu.
