Siphosami Ndlovu akazvarwa musi wa10 Gumiguru 1980 mumusha weDorset mudunhu raIshe Rukuluba kuVungu. Ndlovu akadzidza pazvikoro zvinoti Bumburwi PrimarySchool, Gweru, paDorset Secondary School, Shurugwi nepaMatinunura High School, Gweru. Paakapedza zvidzidzo zvake zve ‘O’level akatanga zvekunyora kusvika parizvino. Ndlovu ndinyanduri anodetemba, kunyora nokutamba mitambo mururimi rweChiShona, IsiNdebele neChirungu. Nduri dzake dzinowanikwa mubhuku akawanda anosanganisira Mutakunanzwa wenhetembo (Booklove Publishers) iro rakambodzidzwa muzvikoro, Izinkondlo ezinhlobonhlobo (ZPH), Izimbongi zikaMthwakazi (ZPH), Tipindewo Mudariro (Essential Book Publishers), Cry from the deep silence (Essential Book Publishers), Yorira Ngoma Yenhetembo (Dream Discovery Publishers), Kalivikwa (Dream Discovery Publishers) nemamwe mazhinji aribubikiro. Ndlovu munyori wenhunha dzakasiyasiyana dzimwe dzakatsikiswa mumapepanhau nemumadandemutande murwiri wekodzero dzavanhu kunyaya panyanya dzebudiriro tsika namagariro .
Takaitei
Takavarairwa ndokupinga mukoko wenyuchi.
Nyuchi dzikamwa hwose huchi sokuseka,
Dzikati zvirinane tife matumbu ati tashu.
Dzese nemazana zvangoti kunguma- tasa!
Nhasi totarisira kumora uchi,
Pamukuze wemarumamombe,
Nekuti anonhuwa senyuchi.
Heya nokuti ane mhumhu wenyuchi
Igo igo sandi nyuchi!
Zviroto zvechembere kurota ichiyanwa.
Tichatenda maruva tadya chakata .
Nokuti tariro yambunyikidzwa.,
Pundutso yachonjomara parufuse.
Chagara munzira chatsunga.
Anokutukira badza sandi muroyi, asi anokupa upfumi!
Ngaticheme netariro!
Takwidibirwa nerima
Rima rarimira gamba pasi
Zhenje romoto rati pitipiti muura
Midzimu yadimbura mbereko
Tabayiwa panama nhete
Kuchitsvanzwadzira chake chiso
Hwangova ubariubari huzere mhidigari
Kuona angova manyambiri emadzengerere
Munhu wose ihama yako
Mungapesana muonero
Mungapesana mafungiro
Mungapesana pazvitendero
Asi munhu wose ihama yako
Kuvenga munhu kuvenga nyakumusika
Nokuti akasikwa nomufananidzo womusiki
Kuvenga munhu kuzvirapa ziso nemhiripiri
Venga zviito siyamunhu
Unhu haana mhosva asi zviito.
Zorora murugare Patrick Mbiba
Tariro yezviroto
Kukava dafi hamawe kuriyambutsa!
Nzanga inokura ndeyerema ,yomuchenjeri inoparara.
Chinobhururuka chinomhara.
Chinokura chinokotama,
Soro regudo rimwe zuva richava chinokoro!
Shungu dzembwa dziri mumwoyo kuhukura kududza.
Shambakodzi irindwa neumwe vaviri haiviri .
Dai yaivira maiona matinini, madanasetswa mavende emhandara.
Usasvora mbodza neinozvimbira,
Rukova rwizi kuyambuka unotokwinya.
Vanoti kukwira gomo hupotera,
Kupotera hunge vari mugomo vachiwisira varipasi mapfihwa.
Ko zvino kana votsvinya vachikumbira varipasi mapfihwa?
Chirahwe chisina dongeri.
Panodya ishe bandauko varanda vanodyawo tsvaratsvata,
Asi chenjerai muchadya pakawora.
Pachapwa madziva zvichida miramba tichanyurura !
Chishuwovo cheadya neganda kuti dai ndadyamunyepfu!
Tinozviziva munoti Nzou mutupo,
Kungoti kwayo nyipu ava machikichori.
N’ai kwadzo ndedzomucheche dzomukuru dzinoreva kudya.
Kumedza bvupa kuvimba gurokuro,
Mwana wengwe kuona chikara haatizi!
Munyai mutumwa, muridzi weshoko ndiwe !
Tisapumha muroyi padyiwa chembere iro bere rarutsa imvi.
Tayaura
Tongepwere kusvetuka nokupemberera kudzoka kwegwenya
Sezvinonzi sandidzedu kodzero.
Aripo akagarira basa arikutamba tsoro dzechizivano.
Arikukusha maone eshura roshurira madhorobha.
Kana zvisizvo sei rima racho richionekwa kuvaranda badzi, Kwamadzimambo richigara riri jenaguru?
Sei minyatso yedzavo pombi isingapwi sedzavanhuwo zvavo?
Hamheno kuti kunzi mambo zvinoreva mwoyo mukukutu here?
Hunoreva hutsinye humambo?
Humambo zvinoreva huori here?
Vana vakatiringa dzichava nhodzera mangwana.
Chaonekwa neziso chinonamira zvachose pamboni!
Zvinorevei zvinoreva humambo?
Tirikudzidzisei vamangwana nezvinoreva humambo?
Kunzi mambo zvinoreva huhandinzerwo here?
Kunzi mambo zvinoreva huzanondoga here?
Kunzi mambo zvinoreva kuvanenyama dzesimba here?
Kusimba ikagon’en’nwa namamiriro kunze wani?
Korwayo hupenyu hukagoboverwa nenguva wani?
Tirikudzidzisei vamangwana?
Kuti gutsaruzhinji zvoreva gudzavashoma here?
Tirikudzidzisei vadiki kuti zvigaro zvinavene vakanamirapo here?
Kuvanamanura heyo ngozi yokufa umire sechibhorani?
Hwavagari vemudhorobha hupenyu hwava hwehwakumukwaku kutsvanzwadzira raramo murima rakati ndoo
Makarionepi dhorobha rizere zvikwangwani pamagedhe
Zvimwe zvikati “Weboora pano ”
“Chakabikwa nechakagochwa”
Zvimwe zvikati “Tirikutengesa nyoro”
Wenera kwete Joni
Yakarera vanhu Wenera.
Zamu rayo richasisa.
Richimimina mutuvi.
Richirutsa zifa noruomba.
Nhasi yabuna sezamu rechembere.
Vanhu vakanga vachine mwoyo,
Yakaendepi mwoyo yokubereka?
Mwoyo yokutsvukisa chin’ai.
Chinonzi mapudzi chichayera sechisi.
Nhasi vokamhina nemwandabvu yeJoni.
Mapodzi ogonzipovo tsve sekamba.
Voyeredzwa nemapopoma eLimpopo.
Mudzimaivo woti ndoendavo,
Zvokugarira guyo sembwa bodo.
Handina kuvinga sadza risipo.
Vana chipo vava vana chirera nherera chikoro chati karanana!
Vabatwa zvino namangoromera omuchiuno mavo.
Kushuzha vachinombora rufu nomumwe.
Tuvana shuga baba tovaita nyama yamakora.
Pavano edzera huturu hwaavo mapara.
Zvavo zvimbambaira zvichiputitsa hwavo hupenyu.
