Munyori wenhetembo dzechirungu nechishona. Dzimwe dzenhetembo dzake dzakatsikiswa mumabhuku anoti Tipindewo Mudariro ( Essential Publishers), (Mupakwa werwendo) Progressive Publishers, Zambuko (Essential Publishers), Maungira eZimbabwe, Nhorido (Drem Discovery), Bleeding tree ( Essential Publishers) na Cries from deep silence ( Essential Publishers). Chikumbo anobva kuBikita kuMasvingo. Zvizhinji nezvake anobatika paWhatsApp nepaFacebook.
Netembo Shanu DzaTinashe Chikumbo
Ugo hwenhetembo
Ndomuka hwandambe kuridza mapika.
Gandira nehosho ndichiimba chamutengure.
Mudariro ndichibvukuta nhetembo,
Dzemadzinza, rayiro, rufu, rudo neyemuro.
Kunyunyuta, ndyariro,
Ndichizavaza, muugo hwenhetembo.
Nheketerwa, dzounga hwenhetembo ndichipangura.
Pangu pangu chingoma chaZindoenda.
Shavi rezendamasiinda rasiti tuku.
Ndotsiura mvangamakomwe,
Ndambakuudzwa ndoruma nzeve.
Vangoni vebasa ndopembedza.
Mbumbuchena ndodzikasvisa mataipedza,
Muugo hwenhetembo.
Gombwe renyika yaVaDuma,
Nevanji waJongwe, Rusakaniko, Mutinini,
Mutungachuru cheUbvume.
Vari Mutikizizi, vakati zikiziki,
Ndauya ndakagukuchira mondo yerutendo,
Rutendo rwuri muchainga cheugo hwenhetembo.
Tambirai vari Govera,
Pasichibunji, mugova maGovera.
Vari Tanganyika, vari Chibvumani.
Pavende regomo reMutunhuvevhu.
Hwehwo ugo hwenhetembo.
Hero zana renyu raramba kufira muzinga sezana.
Ndosaka monzwa rokwetsura mhere yeumhare mugomo raMhari.
Kushaura ruyo rwenhetembo,
Barendava muzukuru,
Ndashaya chipeto chenhevedzo kumadzisekuru ako.
Chandawana ugo hwenhetembo dzokuvatenda.
Chizororai vari pasi,
Vari mafuramhepo emabweadziva masvinga mashava.
Vari Muuriga, gomo reumambo,
Rine mhute inenge unga.
Kupfumbuka kwayo chirevo, cheumambo.
Ndatsvotika mukombe nefodya.
Chisimbaradzai simba reugo hwenhetembo dzandichapangura.
Vachati
Pauchamuka hwandambe uchidzoka undumba,
Nguva yomurirakamwe murusvosvadova.
Kundorichura kumaricho,
Uchidikitira mumabikita.
Kushavira mhuri chouviri.
Pauchainganidza pfuma vachati wakaromba.
Wenyama haatendi Mwendamberi.
Varipo, vakagarira tsoropodzo yendaramo yako.
Pauchanzvenga pfumo rezvivi,
Pauchafamba mumakwara matsvene.
Kutya nekuda Mwari zvagara mudundundu mako.
Zvanza zvako zvichiteta kuba nekuponda.
Dzako tsoka dzichikokomwa kutsika munzira dzezvitadzo.
Tenzi vokupa makore mazana endaramo,
Mwanangu vachati wakadya moyo wejarakamba.
Pauchabatsira nherera neshirikadzi dzenzanga.
Mbumbuchena, uchidzipa chidiki chinorera moyo.
Uchichemedza varombo nemufaro.
Zvaunazvo wogovana navarombo.
Ipai zvose zvamunazvo kuvarombo Jesu kureva.
Puchazvigona vachati, kurashidza.
Pauchatema gombo,
Kupisa rutsva nekurima.
Wozadza matura tashu tashu.
Zvasara, kuminda shiri dzedenga dzorarama.
Wedenga wokomborera,
Vachati une divisi.
Mwanangu, usakande mapfumo pasi nyangwe vakutorera.
Simba rehove riri mumvura,
Tenda nekuvimba kuti kudenga kuna Mwari.
Ndodziko nemusimboti wendaramo.
Nekuti zvese zvepanyika hazvina maturo.
Zvichapera sedova nekubuda kwezuva.
Seruva remunakamwe zvichasvava.
Asi rake shoko nekusingaperi richararama.
Chibata aya mashoko,
Ini ndovata, tosangana parumuko.
Nhoroondo
Kangu kasarima pafudzi kore.
Mudonzvo dzvii.
Munzira yengu tande.
Kunokakashura magwidhi muchikomo.
Ukurudza, ndozvahunoita.
Handigariri maoko,
Ndinodikitira, siku nesikati.
Ndonzvo, kuti ndisiye nhoroondo panyika.
Hecho chitsvambe vananyanduri.
Itsikai yekumuka mune mabori?
Utonga kutsvuka muchidzifoza,
Kuridza magwiriri.
Simbe enda kumujuru,
Uone nhoroondo yekubatwa kwebasa.
Nesuvo ngatidaro.
Tisavate nezamu mumuromo,
Tarirai ndimi chiedza chenyika.
Tiri munyu wenyika.
Iwe neni, ini newe tine basa.
Rekuruka nhoroondo yenyika yamangwana, zuro nanhasi.
Hosi kufa inosiya imwe.
VaHamutyinei, VaKumbirai nevamwe vakapfumbidza magwanza,
Ndiwo makwara otonzunzutira maari.
Nhoroondo yavakasiya, inofirei tiripo?
Hazvidi godobori kana kurova hakata.
Munodirei kutsamwisa, midzimu yenhetembo.
VaHodza, VaMatindike VaMungoshi nezvimwe zvitopota zvakatisiya.
Marangwanda avo omuka here?
Variko nyikadzimu ngavafare,
Nekuona nhoroondo yavakasiya ichifambira mberi.
Mabvazuva ndimi, MaNyika muriyo,
Chamhembe, kunorira pfeni, Gorekore rira tinzwe.
Madokero, maNdebele ‘khulumani sizwe.‘
MaKaranga eVhitori kumaodzanyemba roita zvidavado.
Tazemberana neMaVenda MaShangani hupangura.
Tikadaro rusvingo rwenhoroondo runomira.
Rume rimwe harikombi churu,
Chara chimwe hachitswanyi inda.
Zvanza zvinogezana.
Chiuya Tembo, WeGona Chitova, Hungwe Chasura,
Nhari, Nhuka Mhofu,
Chihwa, Humba newe Musaigwa.
Navose vari mukudetemba,
Ngatisimudzei mureza munhoroondo yakasiiwa,
Navakatanga vasati vatura befu.
Mai Susan
Mai vangu Magondo iwee!
Chii chandirikuona ichi ?
Kuda kurota, regai ndizvitsunye!
Aaaah ahikaka, handisi kurota.
MaDube, ndiudze asiya chikabudura chekhakhi ichi ndiyani?
Hapangadyiwi rinopisa pano mai Susan!
Usati wadura pajekerere,
Kuti asiya chigusvani chefodya ndiyani?
Iwe unoziva handiputi!
Ha-a-a, iyi haipereri pano!
Muzanerima haitirwi zvemadhambudhanana mutariko wemadhende.
Ndiudze MaDube wasiya nyatera iri ndiyani?
Usada kundibata kumeso oo!
Nhasi hariviri uri mupenyu!
Namai vangu Ngauone!
Vari mhiri kwaNyan’ombe!
Nhasi rinonanzva mutsipa!
Ukasandiudza kuti urwu rushoka ndorwani ?
Ndotoita undumba undumba ndichaenda kwaPfidzai!
Yangu pfuma vanondondidzorera!
Handifungi gudza remunhu wese ini!
Mai Susan pano twako kumba!
Nhovo yangu kubvumburudzwa!
O-o-oo, hapana chekuvanza apa!
Zvingori pachena kuti nhovo yangu yatambirwa jinyika.
Manje ini pangu pano pane zita rinoyera.
Hapaitwi zvedambe!
Paruvato pangu kuitwa madirativhange doro romuchaiwa.
Ndikasafuka rangu ndoga, ndiwe ucharifuka!
Mudziyo wandakabvisira gumi remombe nemuraudzo,
Ndowoitwa machakwimachakwi kudai!
Bodo hazvigoni mai Susan!
Usati wandiudza kuti ndorwani rusheti rwomutowenyemba urwu,
Unosiya nyemba tichikuya!
Ndakunyika bunzawabaya bakatwa raMasaya!
Ndaizviziva kuti chapinda kamwe hachiteiwi.
Svondo rapfuura iroo!
Ndamboona bvunurwa rayo kumadota ukoo!
Nhasi ndakubata, chindiudza,
Kuti wawabikira ndiyani?
MaMoyo wangu
Evoyi maera moyo.
Hekani MaMoyo wangu.
VaChidovi vangu.
Chiuya changu chichi.
Chinondiyemesa pakurezvana.
Vahute vakabva Sena neTanganyika.
Mamoyo vangu vane zidefe zitenderere.
Rakafukidzwa netsanga nyoro.
Rine mvura tonhozipe ,
Inomwiwa neapfugama.
Apfugama nehogogo, mabvi nemagokora.
Mamoyo wangu vatungi vechitete.
Chikobvu chinodzamura
Vane dziva risitungenguo.
Neguvi rizere mupunga muchena.
Vane ndoro chena.
Vane zhinji makwizira nemapuruzvira.
Shongove yasakara,vanoisa tsva.
Vane rutovatova rwakatyora nhombori yashe.
Hekani Mamoyo wangu.
Manakira panhovo gunde repwa.
Vane chidawo chisina masvisvinwa.
Muchembere wegono.
Ndimi chirera nherera,
Mukati siya mai tiswere tichirezvana panhovo.
Maita Mamoyo wangu.
